CC BY
25МААРИФ ИШЛЕРИ -ДЕЛА ПРОСВЕЩЕНИЯ
УДК 373:372.8:81(=512.1)
Кокиева Айше1 E_ mail: kokiyevaCaro. ru
МУЭЛЛИФНИНЪ УСУЛИЙ МЕВАМЫНЫНЪ АЛЬ ЭТИДЖИ ШЕКЛИ («КЪЫРЫМТАТАР ЭДЕБИЯТЫ» 8 СЫНЫФ ИЧЮН ОКЪУВ-УСУЛИЙ КОМПЛЕКТИ ЭСАСЫНДА)
Анълатма. Макъаледе умумтасиль муэссиселери ичюн нешир этильген «Къырымтатар эдебияты» (8 сыныф) окъув-усулий комплектнинъ тертип этюв ве ишлев теджрибеси къыскъа шекильде талиль олуна. Усулий къулланма, хрестоматия, оджалар ичюн усулий къуланма киби учь такъымнынъ умумтасиль мектеплерде зарурлыгъы мисаллернен исбатлана. Окъув-усулий комплект муэллифнинъ усулий мевамынынъ аль этиджи ве аллель-хусус бир шекли олгъаны къайд этиле.
Анахтар сёзлер: умумтасиль мектеп, окъув-усулий комплект, аль этиджи шекиль, муэллифнинъ усулий мевамы, амелий теджрибе.
Къырымтатар ве рус тиллеринде окъуткъан умумтасиль муэссиселери ичюн нешир олунгъан окъув-усулий комплект [6, 7, 8] илериде тасиль саасыны джанландыраджакъ къыйметли васта ве аль этиджи бир шекильдир. Ондан да гъайры мувафакъиетке иришмек огърунда япылгъан хызметнинъ бир ёлудыр. Оларнынъ шекли, мундеридже, язылув услюби ве такъдим этилюв инджеликлери муэллифнинъ усулий мевамыны акс эте. «Къырымтатар эдебияты» (8 сыныф) окъув-усулий комплектинде муэллифнинъ усулий мевамы амельге насыл кечирильгени дикъкъаткъа ляйыкътыр.
Русиеде рус эдебияты боюнджа 8 сыныфлар ичюн язылгъан окъув-усулий комплектлернинъ язылув усулы ве теджрибесини Г.И. Беленький [3], Е.В. Бунеева, Р.Н. Бунеев [4], В.Я. Коровина [9], Г.С. Меркин [10] киби муэллифлернинъ дерсликлеринден огренмек мумкюн. Илим саасында окъув комплектлернинъ азырлав ве нешир этювде психологик, дидактик меселелернинъ мукеммеллештирилювини Л.И. Айдарова [1], Ю.К. Бабанский [2], Е.А. Зинина, Л.М. Рыбченкова [5] киби алимлернинъ хызметлериндеки хусусий джеэтлерининъ талили япаджакъ ишимизни керекли ёнелишке догьрултмагьа ярдым эттилер. Дерслик ве окъув къулланмаларнынъ типологик хусусиетлери талиль этилерек, уйгъун джеэтлери сечильди ве ишимизде В.П. Максаковскийнинъ [11] къулланмаларына мураджаат этмек сырасы кельди.
Сонъки сенелерде тасиль саасында бир чокъ денъишювлер олып кечмекте. Къырымтатар эдебияты боюнджа алынып барылгъан тасиль окъув-усулий комплектлернен силяланмакъта. Окъув-усулий комплектернинъ умумтасиль мектеплер ичюн эльверишли ве файдалы олгъаныны муэллифнинъ усулий мевамыны тасдыкълагъан алель-хусус джеэтлерге дикъкъат айырмакъ истеймиз.
Учь компоненттен ибарет окъув-усулий къулланма миллий мектеплер ичюн эльверишлими? Эльбет де, оларнынъ эльверишли оладжагъы мектеплерде дерслерге айырылгъан саатлернинъ мыкъдарынен тайинлене биле. Саатлер аз олып, окъув къулланмада такъдим олунгъан малюмат артыкъ олгъан арада, оджа насыл чалышмалы экен? Бизим
1 Кокиева Айше, младший научный сотрудник НИИ крымскотатарской филологии, истории и культуры этносов Крыма ГБОУВО РК КИПУ (Симферополь, Крым).
вазиетимизде муэллиф тарафындан такъдим олунгъан малюматны оджа дерслерге айырылгъан саатлер эсасында сайлап аладжагъы бес-беллидир.
Русиеде земаневий мектеплернинъ 8 сыныфларында алынып барылгъан тасиль Г.И. Беленький, Р.Н. Бунеев, В.Я. Коровина, Т.Ф. Курдюмова, Г.С. Меркин, киби бир сыра алимлер тарафындан азырлангъан окъув-усулий комплектлер: дерслик, окъув къулланма, хрестоматия, оджалар ичюн окъув-усулий къулланма, практикум, иш дефтерлери, фонохрестоматиялар, дидактик материалларнен теминленди. Сыныфтан тыш окъув ичюн хрестоматияларнен бир сырада окъув китаплары, эдебият боюнджа сыныфтан тыш тедбирлерни кечирмек ичюн махсус къарарлаштырылгъан къулланмалар, программа боюнджа къарарлаштырылгъан ве бедиий эсернинъ талилинде эр бир джеэтни къаплап алгъан къошумча суаллер ве вазифелер, усулий тевсиелер ишленильди.
Юкъарыда анъылгъан эснаста ишимиз девам этильсе, Русиедеки Федераль девлет тасиль стандартларына ынтылып, биз де бу ёлнен инкишф этсек, илериде имкянларымыз артып, юкъарыда анъылып кечильген комплектлернинъ азырланувына иссе къоша билирмиз. Эки сене девамында дерсликлерни азырлав эснасы вакъыт кетишатында хусусий бир ёнелиш алды. Ильк девирде тасиль назирлиги тарафындан муэллифлерге дерсликлер язмакъ вазифеси авале олунды. Сонъра исе дерсликке хрестоматия тертип этмек буйругъы къошулды. Даа сонъра исе, Русиеде чыкьырылгьан эдебият дерсликлерининъ стандартына уймакъ макъсадынен, бу эки комплектке къошумча оларакъ оджалар ичюн окъув-усулий къулланманынъ язылмасы талап этильди.
Нетиджеде, 2015 сенеси Федераль девлет тасиль стандарты эсасында ишленген ве А.С. Абдулятифовнынъ реберлиги алтында 5-9 сыныфлар ичюн нешир олунгъан «Къырымтатар эдебияты» фени боюнджа тизильген тахминий программагъа эсасланып, [12] къырымтатар тили ве эдебияты боюнджа бир сыра окъув-усулий комплектлер азырланды.
8 сыныф боюнджа «Къырымтатар эдебияты» окъув-усулий комплектнинъ тизилюви умумтасиль муэссиселеринде къырымтатар эдебиятынынъ уйгъун бир системада окъутулувы макъсадынен, 8 сыныф программасында талап этильген мундеридженинъ тертибини кенишлетип, муайенлештирмек сырасы кельди. Эсерлернинъ язылгъан сенелерине коре, языджыларнынъ иджат эткен деври такъдим этильди. Меселя, XVII асыр иджат эткен Мехмед Факъри ве Хурреми Челебининъ иджады программада [12, с. 127] XVI асырда шаири Гъазайиден эвель косьтерильгенини козь огюне алып, къырымтатар эдебиятынынъ Къырым ханлыгъы деврини болюклерге болип, такъдим этмек ёлу сечильди. Нетиджеде, «XVI асыр къырымтатар шиириетинден» рубрикалары алтында Гъазайининъ, «XVII асыр къырымтатар шиириетинден» Ашыкъ Умер ве Мустафа Джевхэрийнинъ, «XVIII асыр къырымтатар шиириетинден» Хурреми Челеби ве Мехмед Факърининъ аятий ве иджадий фаалиетлери бир тертипке чекилип, дерсликте айны арды-сыралыкъта анълатылды [6, с. 253 - 254].
Языкълар олсун, программада кене де шойле уйгъунсызлыкъ «Къырымтатар эдебиятынынъ уянув деври» ве «ХХ асыр къырымтатар эдебияты» [12, с. 128 - 129] такъдим олунгъанда, языджыларнынъ тертиби бири-бири пешинден эсерлерининъ язылув сенелерине бакъылып къоюлмагъанына базанаракъ, козьден къачырылгъан нукъсанлыкъны тюзетмек сырасы кельди. Программада «Уянув деври» болюгине И. Гаспринский, О. Акъчокъракълы, А. Одабаш, А. Чергеевнинъ арды-сыралыкъ тертиби А. Одабашнынъ эсери 20 сенелерде язылгъаны ичюн, ХХ асыр къырымтатар эдебияты болюгине авуштырылды [6, с. 255] ве онынъ ерине Номан Челебиджиханнынъ аятий ве иджадий фаалиети ерлештирильди [6, с. 254].
Окъув къулланмада «ХХ асыр эдебияты» девринде чешит жанрларнынъ: шиириет, несир ве драматургиянынъ такъдим этильгенини нокътаи назаргъа алып, талебелерге къырымтатар эдебияты тарихинде жанрларнынъ илерилев хусусиетлерини анълатмакъны, тиль услюбиетини айдынлатмакъны лязим корьдик. Нетиджеде, «Инкъиляп арфесинде ве йигирминджи сенелердеки къырымтатар шиириети» (Б. Чобан-заде, А. Гирайбай),
«Йигирминджи сенелер несирджилиги» (А. Одабаш, Дж. Сейдамет, У. Ипчи), «Йигирминджи ве отузынджы сенелер драматургиясы» (Ю. Болат) киби болюклер кешф этилип, талилий ве назарий малюматлар язылды.
Бу болюклер сыраланмагъан олса, Ю. Болатнынъ 30-нджы сенелерде язылгъан «Арзы къыз» драмасы Ш. Алядиннинъ сюргюнлик девринде язылгъан эсерлеринден сонъ огрениледжек эди ве эдебиятта къоюлгъан девирлештирюв эснасынынъ догъру такъдим этильмегени, муим тертипни бозып, талебенинъ малюматны синъирип алув къабилиетине тесир этип, къалабалыкъ пейда эте биле эди [12, с. 129].
Программагъа кирсетильген Ш. Алядин, Э. Шемьи-заде, Ю. Темиркъая, Ш. Селим киби муэллифлернинъ эсерлери «Къырымтатар эдебиятынынъ сюргюнлик деври» алтында такъдим олунды [6, с. 254]. Бу болюкке шиирий ве несир эсерлер кирсетильгени козь огюне алынып, «Сюргюнлик девир несирджилиги ве шиириетининъ илерилеви» киби талилий ве назарий малюматны язмакъ сырасы кельди. Юкъарыда анъылгъан талилий ве назарий бильгилер талебелерге илериде огрениледжек эсернинъ мевзу, гъаесини мукеммель тайинлемек алышкъанлыгъыны арттыра биледжеги шубесиздир.
Окъув къулланманынъ мундериджесини тертип этюв, конструирлев захмети орта арада оны янъы ве муим талилий малюматларнен теминлев ишини келип чыкъарды. Программанынъ мундериджесини такъсимлев ве тертипке кетирюв захмети мундериджени толдурып, кенишлетмеге имкян берди. Муэллифнинъ усулий мевамы амельге бойле шекильде тертип олунып, программада козьге алынмагъан меселелерни ишлеп чыкъмагъа мейдан ачты.
Юкъарыда къайд олунгъан окъув-усулий комплектте такъдим этильген малюмат ве бильгилер:
- такъдим этильген обзор мевзунынъ бедиий эсерлер такъымынен деталлештирюв ве муайенлештирюв, умумийлештирюв;
- такъдим этильген бедий эсернинъ талилини эдебиятшынаслыкъта ве илим алеминде айдынлатылгъан монографик бильгилернен теминлев;
- хрестоматияда берильген вазифелерни практикумда къулланылгъан элементлернен теминлев ве мустакъиль фикир, муляаза этюв, нетидже чыкъарув, киби хусусий усулий алгоритм эсасында айдынлатылды.
Окъув-усулий комплектлернинъ мундериджеси, мевзусынынъ шекиллендирилюви насыл эсасландырылды? Окъув къулланма девлет талим стандартларына мувафыкъ дидактик, усулий, педагогик-психологик, эстетик ве гигиеник талаплар эсасында талим алгъан талебелернинъ яшына уйгъун психофизиологик хусусиетлер козь огюне алынып, ишленильди.
Окъув эснасынынъ мукеммель инкишаф этмеси ичюн, назарий малюматлатлардан гъайры амелий-теджрибе ве сынав мешгъулиетлери кирсетильди. Талебелернинъ тасавурыны шекиллетмек, мустакъиль чалышмакъ ичюн деврий окъув бильгилерине илим саасында кешф этильген янъы малюматлар кирсетильди. Эр бир болюкте такъдим олунгъан мевзулар узвийлик, узлюксизликке эсаслангъан шекильде такъдим этильди.
Окъув-усулий къулланмаларнынъ муэллифнинъ усулий мевамынынъ омюрге кечирмеге хызмет эткен бир шекиль олгъаныны тасдыкъламакъ ичюн, оларнынъ шимдики девирде муимлиги айырмакъ лязимдир. Ондан да гъайры къырымтатар тасили саасында япылгъан бу ильки адым фааль инкишаф эткен бир эснаскъа чевирилип, илериде айры ёнелишлер ве бир сыра эльде этиледжек ишлернинъ къошулмасына давет эте биле.
Окъув-усулий къулланмаларнынъ тизилиши ве дидактик эсаслары талебелернинъ бильги алув эснасында темелли бир земин ола биле. Окъув-усулий комплектлер талебелерге фен этрафында къоюлгъан бильгилерни насыл макъсат иле менимсемели, янъы мевзунынъ муайен хусусиетлерини талиль кетишатында зеинге насыл синъирмели, шахсий фикир-муляазаларыны тасдыкълавнен насыл беян этмели деген суаллерге джевап бере биле.
Окъув-усулий комплект оджа ве талебе ичюн кешф олунгъан окъутув эснасынынъ узвий багълы ве уйгъун бирдем бир системада омюрге кечирильген екяне бир вастадыр. Окъув-усулий комплектнинъ учь такъымдан тертип олунгъан эр бир къысмы мундериджесине коре озюнинъ вазифесини беджере.
Окъув къулланмада такъдим олунгъан малюмат, вазифе, суаллер, анълашылмагъан сёзлер ве ибарелернинъ изаатларында бильги алув ве менимсев ёнелишинде талебелернинъ нуткъ инкишафы, тилимизнинъ лексик хусусиетлерине дикъкъат айырыла. Бу ишни девам этерек, илериде бедий эсерлер аудиоязылар этип сеслендирильсе ве фонохрестоматиялар тизильсе, талебелернинъ эм оджаларнынъ да нуткъ инкишафыны арттырув имкяны кенишлетилир эди.
Секизинджи сыныф програмасына кирсетильген бедий эсерлернинъ тизилиш джеэти умумдидактик ве усулий кенишликлернинъ фааллештирильмесине имкян азырлай. Секизинджи сыныфта огрениледжек малюматларнынъ тертип джеэтинден ерлештирилюви муэллифнинъ усулий мевамынынъ аль олунувына хызмет эте.
Огрениледжек малюматларнынъ хронологик ве мевзу джеэтинден муим меселеге чевирилювине муэллиф хусусий эмиет берди. Бу ерде эдебий эснас эсасында эдебий эсернинъ огренилювини, эдебий эсернинъ чешит девирлерде язылгъаныны менимсев ынтылышы, чешит жанрларнынъ такъдим олунув эснасына эмиет берилювине дикъкъат этильди. Учь такъымда да огрениледжек малюмат ве бильгилер тарихий-хронологик эсаста тизильди. Муэллиф тарафындан сечилип алынгъан мевам белли бир тертипте такъдим этилип, адым-адым бедий эсерлерни огренмек ве менимсемек имкянларыны теминлемеге хызмет этти. Тарихий-хронологик эдебий эснаснынъ инкишафы ве илерилеви акъкъында малюматнынъ айдынлатылув ёллары, усулы ве услюбиетине мейдан азырланды.
Окъув-усулий комплектте, муэллифнинъ усулий мевамына бинаэн, айдынлатылгъан миллий эдебиятнынъ жанр джеэтинден зенгинлиги ве бедий вариетнинъ ичтимаий къыймети талебелернинъ эстетик тербиесинде эльверишли ынтылыш, миллий медениетине къыймет кесмеге, ватаны ве миллетини севмеге давет эте.
Кокиева Айше
ФОРМА РЕАЛИЗАЦИИ АВТОРСКОЙ МЕТОДИЧЕСКОЙ КОНЦЕПЦИИ (НА ОСНОВЕ УЧЕБНО-МЕТОДИЧЕСКОГО КОМПЛЕКТА «КРЫМСКОТАТАРСКАЯ
ЛИТЕРАТУРА» ДЛЯ 8 КЛАССА)
Аннотация. В статье кратко проанализирован опыт создания учебно-методического комплекта «Крымскотатарская литература» 8 класс для общеобразовательных организаций. Примерами аргументирована необходимость единства трёх компонентов: учебное пособие, хрестоматия, учебное пособие для учителей. Подтверждена важность обеспечения общеобразовательных школ учебно-методическими комплектами, которые в реализации авторской методической концепции стали его основной формой.
Ключевые слова: общеобразовательная школа, учебно-методический комплект, форма реализации, авторская методическая концепция, практический опыт.
Kokiyeva Ayshe
FORM OF iMPLEMENTATiON OF AUTHOR'S METHODiCAL CONCEPT (BASED ON THE EDUCATiONAL-METHODiCAL KlT FOR EDUCATiONAL iNSTiTUTiONS WiTH TEACHiNG, iN THE CRiMEAN TATAR AND RUSSiAN LANGUAGES BY A. KOKiEVA "CRiMEAN TATAR LiTERATURE" 8TH GRADE)
Summary. The article briefly analyzed the experience of creating an educational-methodical kit "Crimean Tatar literature" for the 8th grade of general education school. Presented examples
clearly show the necessity of the unity of the three components: a schoolbook, a reading book, a methodical for teachers. The importance of providing general education schools with methodological kits, which in the implementation of the author's methodological concept became its main form, has been confirmed.
Keywords: secondary school, educational-methodical kit, form of implementation, author's methodical concept, practical experience.
ЭДЕБИЯТ:
1. Айдарова Л.И. О психологических проблемах конструирования учебных комплексов Л.И. Айдарова // Проблемы школьного учебника. - Вып. 8. - М. : Просвещение, 1980. - С. 17.
2. Бабанский.Ю.К. Дидактические проблемы совершенствования учебных комплектов / Ю.К. Бабанский // Проблемы школьного учебника. - М. : Просвещение, 1980. - Вып. 8. - С. 17.
3. Беленький Г.И. Литература 8 класс: учебник для общеобразовательных учреждений / Г.И. Беленький. - М. : Мнемозина, 2010. - 383+271 с.
4. Бунеева Е.В. Литература 8 класс: Учебник для общеобразовательных учреждений. - В 2-х частях / Е.В. Бунеева, Р.Н. Бунеев. - М. : «Школа 2100» Мнемозина, 2011. - 286+222 с.
5. Зинина Е.А., Рыбченкова Л.М. Учебно-методический комплект по предмету // Современная учебная книга: подготовка и издание / под ред. : С.Г. Антоновой, А.А. Вахрушева. - М., 2004. - С. 51.
6. Кокиева А. Кырымтатар эдебияты. Къырымтатар тиллеринде окъуткъан умумтасиль муэссиселери ичюн окъув къулланмасы. 8 сыныф. / А. Кокиева. - М. : Просвещение, 2017. - 255 с.
7. Кокиева А. Къырымтатар эдебиятынынъ хрестоматиясы. 8 сыныф: къырымтатар ве рус тиллеринде окъуткъан умумтасиль муэссиселери ичюн окъув къулланмасы / А. Кокиева. - М. : Просвещение, 2017. -199 с.
8.Кокиева А. Къырымтатар эдебияты. Умумтасиль муэссиселерининъ оджалары ичюн усулий къулланма. 8 сыныф / А. Кокиева. М. : Просвещение, 2017. - 288 с.
9.Коровина В.Я. Литература 8 класс: Учебник для общеобразовательных учреждений. -В 2-х частях, 10-е изд. / В.Я. Коровина, В.П. Журавлёв, В.И. Коровин. - М. : Просвещение, 2010. - 399+399 с.
10.Меркин Г.С. Литература 8 класс: Учебник для общеобразовательных учреждений. - В 2-х частях, 10-е изд. / Г.С. Меркин. - М. : Дрофа, 2013. - 384+384 с.
11.Максаковский В.П. Пособия для учителей: принципиальные вопросы типологии// Проблемы школьного учебника: ХХ век: Итоги / под ред. : Д.Д. Зуева. - М. : Просвещение, 2004. - С. 327 - 328.
12.Примерные программы по учебным предметам «Крымскотатарский язык (родной)» «Крымскотатарская литература» для общеобразовательных организаций / под ред. : А.С. Аблятипова. - М. : Просвещение, 2015. - 175 с.
